काठमाडौं । मौसमको खराबीका कारण जहाज उड्न ढिलाइ भएपनि उनले विमानस्थलमै साढे पाँच घन्टा प्रतीक्षा गर्नुपर्‍यो वरिष्ठ हास्यकलाकार मनोज गजुरेललाई । मनोज गजुरेल आज पोखराबाट काठमाडौं आउन साढे ८ बजे विमानस्थल पुगे ।

उडान समय ८:५० भए पनि विमान १:३० मा मात्रै उडेको थियो । त्यसबीचको झण्डै पाँच घण्टा गजुरेलले नवनिवर्मित विमानस्थलमा टहलिएर बिताए । आफ्नै देशभित्र यो स्तरको संरचना देख्दा मन गदगद बनेको उनी सुनाउँछन् । ‘पूरै विदेशी विमानस्थलको जस्तो फिलिङ आयो,’ गजुरेलले नेपाल प्रेससँग भने, ‘यति राम्रो एयरपोर्ट बनेछ, अब यसको संरक्षण र संवर्द्धन पनि राज्यले राम्रोसँग गरोस् ।’

विमानस्थलको अत्याधुनिक संरचनाले आफूलाई विदेश यात्राको अनुभव भएको उनले सुनाए । तर, लामो प्रतीक्षापछिको उडान अनुभव भने सुखद हुन सकेन । मौसमको खराबी र ट्राफिक जामका कारण जहाज आकाशमै होल्ड हुँदा मनोजसँगै यात्रुहरू नर्भस बनेका थिए । नहुन् पनि किन, भर्खरै यति एयरलाइन्सको विमान दुर्घटना सबैको मनमा ताजै थियो ।

‘एक घण्टासम्म जहाज होल्ड हुँदा सबैलाई डर त लागिहाल्छ नि,’ उनले ठट्यौलो प्रतिक्रिया दिँदै भने, ‘तर, केही नहुञ्जेल केही हुँदैन भन्ने मेरो सिद्धान्तै छ । आफ्नो बसमा नभएको कुरामा टेन्सन लिएर मात्रै के हुन्छ र ?’

परिचारिकाले बाहिरको अवस्थाबारे बताउँदै जहाज ५० मिनेटजति होल्ड हुने पूर्वजानकारी दिएकाले यात्रुहरूलाई राहत मिलेको थियो । तर, ल्यान्ड नहुञ्जेल कोही पनि निश्चिन्त बन्न सकेका थिएनन् । बिहान साढे ९ बजेतिरै काठमाडौं ओर्लिनुपर्ने यात्रुहरु दिउँसो ४ बजेमात्रै ल्यान्ड भएका छन् ।

LEAVE A REPLY

Please enter your comment!
Please enter your name here